உரையாடல் 16
உடம்பு சரியில்லை
ஜிம் - என்ன படுத்திருக்கிறீர்கள்? உடம்பு சுகம் இல்லையா?
ராஜா - உடம்புக்கு ஒன்றும் இல்லை. காலையில் திருப்பரங்குன்றம் போயிருந்-
தேன். இப்போது கொஞ்ச நேரத்துக்கு முன்னால்தான் திரும்பி வந்தேன்.
அதனால் கொஞ்சம் களைப்பாக இருக்கிறது.
ஜிம் - அங்கே என்ன விசேஷம்?
ராஜா - இன்றைக்குக் கார்த்திகை இல்லையா? அது முருகனுக்கு ரொம்ப
விசேஷமான நாள். நான் சாமி கும்பிட அங்கே போனேன். நீங்கள்
அங்கே போயிருக்கிறீர்களா?
ஜிம் - நான் ஒரு தடவை போயிருக்கிறேன். மலைமேல் கூட ஏறிப்
பார்த்திருக்கிறேன். நீங்கள் இன்றைக்கு மலைமேல் ஏறினீர்களா?
ராஜா - எனக்கு வயது ஆகிவிட்டது. என்னால் முடியாது. பஸ்ஸுக்காக
வரிசையில் நிற்கக்கூட முடியவில்லை.
ஜிம் - இந்த சமயத்தில் ரொம்ப பஸ் விடமாட்டார்களா?
ராஜா - ரொம்ப ஸ்பெஷல் பஸ் விட்டிருந்தார்கள். அப்படியும் கூட்டம் குறைய-
வில்லை.
ஜிம் - நீங்கள் பஸ்ஸுக்காக எவ்வளவு நேரம் காத்திருந்தீர்கள்?
ராஜா - சுமார் ஒரு மணி நேரம் காத்திருந்திருப்பேன். அவ்வளவு நேரம்
காத்திருந்தும் பஸ்ஸில் உட்கார இடம் கிடைக்கவில்லை.
ஜிம் - அடப் பாவமே! ரொம்பத்தான் கஷ்டப்பட்டிருக்கிறீர்கள்.
ராஜா - இது மட்டும் இல்லை. கோவிலுக்கு உள்ளேயும் ஒரே கூட்டம். உள்ளே
நுழையவே இடம் இல்லை. எப்படியோ இடித்துக் கிடித்து உள்ளே
போனேன்.
ஜிம் - நல்ல வேளை, நான் உங்களோடு வரவில்லை.
ராஜா - ஆமாம். அந்தக் கூட்டத்தில் நீங்கள் மயங்கி விழுந்திருப்பீர்கள். அதோடு
உங்களை உள்ளே விட்டிருக்கவும் மாட்டார்கள்.
ஜிம் - நீங்கள் படுத்திருங்கள். நாம்தான் அடிக்கடி சந்திக்கிறோமே! நாளைக்குச்
சாவகாசமாகப் பேசுவோம்.